Nýlega samþykkti Dýraverndarráð eftirfarandi ályktanir:

Dýraverndarráð skorar á umhverfisráðherra, sem hefur, skv. 3. gr. laga nr. 64/1994 um vernd, friðun og veiðar á villtum fuglum og villtum spendýrum yfirumsjón með aðgerðum er varða vernd, friðun og veiðar á villtum dýrum, og sjávarútvegs- og landbúnaðarráðherra, sem hefur með girðingamál að gera, að gera úttekt á ástandi girðinga og mögulegum lausnum til að tryggja velferð hreindýra og annarra dýra.

Telur ráðið að hér sé mikilvægt að unnið sé í samvinnu við sveitarstjórnir, búnaðarsambönd og landeigendur til að tryggja að sátt náist um lausn sem tryggi velferð dýranna sem best.

Athyglisvert málþing um aðbúnað og velferð búfjár í íslenskum landbúnaði

Þriðjudagskvöldið 26.apríl hélt Norræna húsið í Vatnsmýri málþing um aðbúnað og velferð búfjár í íslenskum landbúnaði með áherslu á andstæðurnar verksmiðjubúskap, annars vegar, og lífrænan búskap, hinsvegar.

Var málþing þetta haldið í tengslum við sýninguna " Manna - annars konar sýning um mat" sem fjallaði um tengsl manna og umhverfis.  Húsfyllir var. Framsögur fluttu Linda Pétursdóttir, Ólafur R. Dýrmundsson, Sif Traustadóttir og Oddný Anna Björnsdóttir, en með þeim í fjörugum pallborðsumræðum voru bændurnir Kristján Oddsson og Hörður Harðarson. Fundarstjóri var Þuríður Kristjánsdóttir sem skipulagði málþingið fyrir hönd Norræna hússins. Var framlag hennar lofsvert.  

Vænn hópur af þeim 70 félögum sem nú eru í Dýraverndarsambandi Íslands var í salnum og þegar litið er til framsöguerinda og umræðna var þáttur okkur drjúgur. Einnig bar mikið á félögum úr Samtökum lífrænna neytenda sem stofnuð voru í mars s.l. og hópur bænda tók virkan þátt í málþinginu. 

Verksmiðjubúskapurinn var gagnrýndur mikið, einkum vegna augljósra vankanta á velferð dýra í slíkum búskaparkerfum, en vakin var athygli á því að ekki væri við bændur eina að sakast. Þessa óheillaþróun mætti m.a. rekja til krafna neytenda og stjórnmálamanna um sívaxandi kröfur um um hagræðingu og arðsemi til að lækka matvælaverð. Þannig bæri þjóðfélagið í heild ábyrgð á ástandinu. Þótt býsna ólíkar skoðanir kæmu fram voru umræðurnar málefnalegar  og fræðandi,að mestu leyti.

Við sem höfum verið og eru stöðugt að vinna í þessum málum teljum að þetta málþing marki tímamót. 

Fjölmiðlar tóku vel við sér og má m.a. benda á umfjöllun í fréttum Ríkissjónvarpsins kl 19 að kvöldi 27. apríl, grein á www.visir.is þann 28. apríl og að kvöldi þess dags var umfjöllun í Speglinum á Rás 1 hjá Rúv um kl 18.30 og í Kastljósi Ríkissjónvarpsins kl 19.30. Erindi formanns Dýraverndarsambands Íslands á málþinginu er birt hér á vefnum undir liðnum Fræðsluefni.

Ólafur R. Dýrmundsson

Um miðjan apríl hélt Matvælastofnun annað samráðsþing sitt og hafa fulltrúar frá Dýraverndarsambandi Íslands setið þau bæði. Nú voru þau Árni Stefán Árnason og Íris Lilja Ragnarsdóttir fulltrúar okkar á þinginu, hlýddu á þau erindi sem flutt voru og tóku þátt á umræðum í vinnuhópum. 

Matvælastofnun fer með mjög afgerandi eftirlitshlutverk varðandi dýravelferð o.fl. og starfa m.a. allir eftirlitsdýralæknarnir hjá stofnuninni.  Að þessu sinni var einkum fjallað um eftirlitshlutverk MAST sem er mjög fjölþætt og yfirgripsmikið, og í því sambandi var rætt um leiðir til að efla og bæta samskipti við þá aðila sem stofnunin á samskipti við, þar með neytendur og afurðavinnslufyrirtæki. 

Þá var rætt um nýtt dýralæknakerfi þar sem skilið verður á milli eftirlits og þjónustu og greint var frá endurskoðun laga og reglugerða sem varða velferð dýra og búfjárhald.  Vísað er á nánri upplýsingar um samráðsþingið á www.mast.is

Ólafur R. Dýrmundsson

Niðurstöður úr könnun Dýraverndarsambands Íslands í lögregluumdæmum um land allt um meðferð á dýrum sem eru handsömuð eða hafa farist af einhverjum ástæðum.

Umsjón: Klara Helgadóttir og Ólafur R. Dýrmundsson

Umdæmi sem hafa svarað könnuninni: 
Lögreglustjórinn í Reykjavík, Lögreglan á Akranesi, Lögreglan í Borgarfirði og Dölum, Lögreglan á Vestfjörðum, Lögreglan á Blönduósi, Lögreglan á Sauðárkróki, Lögreglan á Akureyri, Lögreglan á Húsavík, Lögreglan á Seyðisfirði, Lögreglan á Eskifirði, Lögreglan á Hvolsvelli, Lögreglan í Vestmannaeyjum, Lögreglan á Selfossi og Lögreglan á Suðurnesjum.

Svör:
Ef um er að ræða gæludýr er haft samband við eiganda, ef hann er þekktur, eða eftirlitsmann sveitarfélags (dýraeftirlitsmann). Þegar um búfé er að ræða  er reynt að hafa upp á eiganda, ef hann er þekktur, eða búfjáreftirlitsmann og bónda. Oft er haft samband við dýralækni. Ef dýrið er mikið slasað aflífar lögreglan það yfirleitt samstundis á staðnum með skotvopni. Ef ekki er hægt að finna eiganda dýrsins er það yfirleitt urðað eða sett í sorpbrennslu.

2. Hver eru viðbrögðin þegar dauð dýr finnast eða farst, t.d. vegna ákeyrslu í umferðinni?

Svör:

Reynt er að finna eiganda dýrsins. Sums staðar er haft samband við dýraeftirlitsmenn eða búfjáreftirlitsmenn (starfsmann sveitarfélaga). Ef eigendur finnast ekki eru dauð dýr sett í urðun eða sorpbrennslu.

3. Hver eru viðbrögðin ef laus dýr finnast, þ.e. sloppin eða sleppt að heiman eða á lausagöngu af sömu ástæðum?

Svör: 
Reynt er að hafa uppá eigandanum, ef hann er þekktur. Annars er dýrið venjulega afhent dýraeftirlitsmanni (sé um gæludýr að ræða) eða búfjáreftirlitsmanni (þegar um búfé er að ræða), þannig að sveitarfélagið ber ábyrgð á þeim. Á höfuðborgarsvæðinu fara óskilakettir oftast í Kattholt og hundum er komið fyrir tímabundið á hundahótelum.

4. Hvert er farið með dýrið og hvað er gert til að hafa samband við eigendur í tilvikum 1), 2) og 3) hér að framan?

Svör:

Venjulega er farið með dýrið í húsnæði eða aðstöðu sem sveitarfélagið hefur tiltækt, stundum fyrst á lögreglustöð ef um lítil dýr er að ræða. Kannaðar eru merkingar eða mörk á dýrunum til að finna eiganda. Ef hann finnst er venjulega hringt í hann. Ef það tekst ekki getur þurft að farga dýrinu, nema sveitarfélagið hafi önnur úrræði. Þarna kemur til kasta bæði dýraeftirlitsmanna og búfjáreftirlitsmanna.

5. Eru til verklagsreglur  um afskipti starfsmanna sveitarfélagsins og lögreglu af dýrum í viðkomandi umdæmi?

Svör: 
Nei, aðeins hjá Lögreglunni í Reykjavík. Reglur um þessi mál eru ekki samræmdar á öllu landinu og sumir telja ekki þörf á skriflegum reglum. Þó minna sumir á að í samþykktum um búfjárhald séu víða til reglur um meðferð búfjár á lausagöngu. Sums staðar nýtast samþykktir um hundahald og kattahald. Sum lögregluyfirvöld hafa beðið sveitarfélög um slíkar reglur og þess eru dæmi að slíkum beiðnum hafi verið hafnað.

6. Hver er afstaða sveitarfélagsins og lögreglunnar til merkingar og skráningar dýra? Hvernig er henni háttað, hvaða dýrategundir eru merktar og hver er afstaðan til stofnunar miðlægs gagnagrunns fyrir gæludýr í landinu líkt og er fyrir búfé hjá Bændasamtökum Íslands?

Svör: 
Allir telja bættar merkingar til bóta. Það myndi greiða fyrir allri meðhöndlun dýra hjá lögreglu og sveitarfélögum. Lögreglan hefur þó venjulega ekki aflestrartæki fyrir örmerki og ekki heldur starfsmenn sveitarfélaganna. Því þarf oft að leita til dýralækna eða hestaeigenda sem kunna að eiga slík tæki. Mjög jákvæð viðbrögð eru við uppsetningu miðlægs gagnagrunns en sum umdæmin taka þó ekki afstöðu til þess. Þó er þetta sú niðurstaða könnunarinnar sem vegur einna þyngst, því að miðlægur gagnagrunnur myndi greiða mikið fyrir meðhöndlun dýranna við hinar ýmsu aðstæður.




Gagnagrunnur fyrir öll örmerkt dýr á landinu

Þess má geta að þegar verið var að draga saman framangreindar niðurstöður var það merka skref stigið, nánar tiltekið á Jólaföstu 2010, að Völustallur, hlutafélag í eigu Dýralæknafélags Íslands, undirritaði samning við Tölvudeild Bændasamtaka Íslands um að smíða vefforrit og miðlægan gagnagrunn fyrir öll örmerkt gæludýr í landinu.

Gert er ráð fyrir að 1. útgáfa verði tilbúin 15. mars 2011. Þetta verður gífurleg framför því að dýralæknar munu framvegis skrá öll örmerkt gæludýr inn í sameiginlegan gagnabanka og þá geta lögregluyfirvöld, sveitarfélög og heilbrigðisyfirvöld nálgast upplýsingar um dýrin á einum stað. Eigendur munu hafa greiðan aðgang að upplýsingum um eigin dýr. Dýraverndarsamband Íslands, sem hefur verið mjög fylgjandi þessari þróun, lýsir yfir mikilli ánægju með þetta framtak

(Samantekt 26/12/10)

______________________________________________________________________
 

Abstract in English: A survey was carried out by Klara Helgadóttir and Ólafur R. Dýrmundsson in 14 police departments in Iceland, covering the whole country, on the handling of stray or dead animals reported to the police. All of them had ways and means of taking care of such cases and are capable of seeking help from other bodies when  needed. However, only the Reykjavík Police Department has a written protocol on the handling of animals in such circumstances. This could serve as a good example in efforts to improve procedures to the benefit of the animals and their owners.

There was a general wish that animals should be more clearly identified, especially by microchips, and that a central databank for pets should be established in a similar way as national databanks for livestock operated by the Farmers Association of Iceland. The good news arrived just before Christmas 2010 that a company owned by the Veterinary Society of Iceland is pioneering such a central databank and is planning to have it operational in 2011. We fully support this initative which will be a great advancement.

(Compiled 26/12/10)